Coro da Ra: 30 anos de música sen fronteiras

O Coro da Ra naceu en 1993 da man do seu director Ramón Bermejo, cunha proposta innovadora e valente: levar ao ámbito coral estilos musicais pouco habituais en Galicia, como o soul, o pop, o rock ou a bossa nova. Desde entón, o coro consolidouse como unha das formacións máis orixinais e versátiles do panorama musical galego.

O seu repertorio abrangue desde clásicos como os Beatles, Queen ou Pink Floyd, ata figuras como Stevie Wonder, Frank Zappa, Earth, Wind & Fire, A.C. Jobim ou Caetano Veloso. Esta diversidade musical foi acompañada dunha posta en escena creativa e sorprendente, con concertos nas rúas e prazas de Galicia que combinaban música, teatro, humor e un certo toque surrealista.

Ao longo da súa traxectoria, o Coro da Ra contou con excelentes voces, moitas das cales desenvolveron posteriormente proxectos musicais propios de gran éxito. Actuaron en escenarios emblemáticos como o Teatro Principal e o Auditorio de Galicia en Santiago, o Teatro Colón da Coruña e de Vigo, e foron presenza habitual na TVG e en eventos como os Premios María Casares, Mestre Mateo ou os Premios da Cultura Galega.

Na actualidade, o seu repertorio céntrase na música galega e luso-brasileira, con pezas tradicionais e temas de autores como Andrés do Barro, Fran Pérez “Narf”, Pepe Sendón, Chico Buarque ou Marisa Monte. En decembro de 2023 celebraron o seu 30 aniversario cun concerto especial no Auditorio de Galicia, e no verán de 2024 estrearon unha renovada versión do Himno de Galicia na “Inchadiña Branca Vela” de Padrón.

O Coro da Ra continúa a súa andaina cun espírito libre, creativo e comprometido coa diversidade musical e cultural.